قبل كم يوم اتناقشت اني وأصدقاء ليا في الكلية عن موضوع ممكن يبدو للبعض إنه موضوع عادي جدا ومفروغ منه ومفيش حتى داعي للمناقشة فيه, هو موضوع تعدد الزوجات , يعني تعدد الزوجات شي حلله ربي في ديننا الاسلامي ولكن لظروف معينة, متلا لنفرض ان رجل متزوج من وحدة عقيمة , شن الحل؟ يطلقها أو ياتزوج تاني؟ الجواب طبعا انه بيتزوج تاني, لنفرض انه في اطفال ولكن الزوجة مرضت ومعاش تقدر تتحمل مسؤولية هالأطفال , وحالة الزوج المادية ماتسمحش يجيب نانا للصغار, شن الحل؟ بردو يتزوج تاني, لكن اللي يبي يروح من الخدمة يلقى مرته موتية الغدا ومغدية الصغار ومرقدتهم وماشطة شعرها ومساوية روحها, يمشي يروح يلقاها مشفشفة وصنتها بصلة تطيرله منها يمشي ياخد وحدة تانية, تو بالله هدا واحد يخاف ربي؟ يعني شني هيا بتبهدل روحها عالكساد هكي وخلاص؟ ولا لان الصغار يبهدلو ستين بنادم فاضي فمبالك الام اللي من اول ماتنوض الصبح لن ترقد وهيا على رجليها؟ وهدا الكلام فعلا صاير, ياخد عليها لانها معاش تهتم بنفسها زي الاول, وفي حالات من الزواج التاني اسبابها اتضحك, ولما يجو يكلموه يقوللك الشرع محلل اربعة, يعني شي مؤسف اننا نستغلو في تعاليم ديننا بالشكل هدا, فبالله ياريت كل واحد فينا يخاف ربي في أهله ياريت.